काठमाडौं । सुदूरपश्चिम प्रदेशका मुख्यमन्त्री खगराज भट्टले प्रदेशसभाबाट विश्वासको मत पाएका छन् । बुधबार बसेको प्रदेशसभा बैठकमा सहभागी ४६ सांसदले मतदान गर्दा भट्टको पक्षमा ३१ र विपक्षमा १५ मत परेको हो ।

प्रदेशसभामा सरकारको नेतृत्व गरिरहेको नेकपाका २० र एमालेका ११ जना सांसदले मुख्यमन्त्री भट्टको पक्षमा मतदान गरे । कांग्रेसका १४ र राप्रपाका एक सांसदले विपक्षमा मतदान गरेका छन् । कांग्रेसका तीन सांसद भने बैठकमा अनुपस्थित रहे ।

नेकपा संसदीय दलका नेता भट्ट गत शुक्रबार सुदूरपश्चिमको पाँचौँ मुख्यमन्त्री नियुक्त भएका थिए । एमाले र नेकपाबीच सत्ता साझेदारीमा सहमति भएपछि कांग्रेस नेतृत्वको सरकार अल्पमतमा परेको थियो ।

सरकार अल्पमतमा परेपछि कांग्रेसका कमलबहादुर शाहले बिहीबार मुख्यमन्त्री पदबाट राजीनामा दिएका थिए । त्यसपछि एमालेको समर्थनमा भट्ट मुख्यमन्त्री नियुक्त भएका हुन् ।