काठमाडौं । सभामुख डोलप्रसाद अर्याल (डीपी)ले व्यावसायिक तथा पेशागत संस्थाभित्र राजनीतिक गतिविधि नगर्न सुझाव दिएका छन् । नेपाल एशोसिएसन अफ टुर एन्ड ट्राभल एजेन्ट्स (नाट्टा)को ५९औँ साधारण सभालाई सम्बोधन गर्दै उनले नाट्टालाई राजनीतिक विवाद र स्वार्थबाट टाढा राख्दै पर्यटन विकास र व्यवसायीको हितमा केन्द्रित हुन आग्रह गरे ।

अर्यालले पर्यटकका लागि सुरक्षा, राम्रो व्यवहार, सेवा र सुविधालाई प्राथमिकता दिनुपर्ने बताए । काठमाडौंमा व्यवस्थित पर्यटक बसपार्क निर्माण, पर्यटनसम्बन्धी कानुन दीर्घकालीन सोचका साथ बनाउनुपर्ने तथा नेपाल वायुसेवा निगममा संरचनागत सुधार आवश्यक रहेको उनको भनाइ थियो ।

नेपाली र विदेशी पर्यटकबीच सेवामा विभेद गर्न नहुनेमा जोड दिँदै उनले राष्ट्रिय हितलाई प्राथमिकता दिन व्यवसायी र सरकारबीच सहकार्य आवश्यक रहेको बताए । साथै, सुशासन कायम गर्दै भ्रष्टाचार अन्त्य गर्न सरकार असफल हुने छुट नरहेको उनले उल्लेख गरे ।