इङ्लिस प्रिमियर लिग फुटबलमा घरेलु टोली लुटन टाउनलाई हराउँदै म्यानचेस्टर सिटीले पुनरागमन गरेको छ ।

गएराति भएको खेलमा लुटन टाउनलाई २-१ गोल अन्तरले हराउँदै सिटीले पुनरागमन जीत निकालेको हो । 

सिटीलाई जीत दिलाउन बेर्नार्डो सिल्भा र ज्याक ग्रेलिशले गोल गरे । लुटनका लागि इमिजाह एडेबायोले एक गोल गरे ।

जितसँगै १६ खेलमा ३३ अंक जोडेको सिटी चौथो स्थानमा छ । पराजय ब्यहोरेको लुटन समान खेलबाट ९ अंकका साथ १८ औं स्थानमा छ ।

यसअघि सिटी लामो समय जीतविहीन बनेको थियो ।

लिगअन्तर्गतकै अन्य खेलमा फुलहमले वेस्टहम युनाइटेडलाई ५-० तथा एभर्टनले चेल्सीलाई २-० ले पराजित गरे ।