काठमाडौं । भारतीय चर्चित अभिनेता श्रेयस तलपडेलाई हृदयघात भएको छ । बिहीबार राति हृदयघात भएपछि उनको मुम्बईको बेलेभ्यु अस्पतालमा एन्जियोप्लास्टी गरिएको अन्तराष्ट्रिय सञ्चार माध्यमा उल्लेख गरिएको छ । 

तलपडेका प्रबन्धकका अनुसार उनको अवस्था अहिले स्थिर रहेको र निको भइरहेको छ । तलपडे ‘वेलकम टु जङ्गल’ फिल्मको सुटिङ गरिरहेका थिए । सुटिङपछि उनलाई हृदयघात भएका हो । 

त्यसपछि राति करिब १० बजे डा वीएन लुलाको नेतृत्वमा उनको मुटुको शल्यक्रिया गरिएको थियो । जनवरीमा ४८ वर्ष पुगेका तलपडे हिन्दी र मराठी फिल्मका चर्चित अभिनेता हुन् ।

सन् २००२ मा फिल्म आंखेबाट बलिउडमा करियर सुरू गरेका तलपडेले ‘इकबाल’, ‘डोर’, ‘ओम शान्ति ओम’, ‘वेलकम टु सज्जनपुर’, ‘गोलमाल’, ‘हाउसफुल’जस्ता धेरै फिल्ममा अभिनय गरेका छन् ।