भरतपुर  । भरतपुर मेयर कप अन्तरविद्यालय क्रिकेट प्रतियोगिताको नकआउट चरणको खेल तालिका सार्वजनिक भएको छ । चैत २६ गतेदेखि सुरु हुने प्रतियोगितामा सहभागी २० विद्यालयलाई दुई समूहमा विभाजन गरिएको छ । 

प्रतियोगितामा सहभागी १० सामुदायिक विद्यालय समूह ‘ए’ मा छन् भने बाँकी १० निजी विद्यालय समूह ‘ख’ मा छन् । माघ २६ देखि फागुन १ गतेसम्म हरेक दिन २ वटा खेल खेल्ने तालिका तयार गरिएको छ ।

नकआउट चरणका विजेता ५ सामुदायिक र ५ निजी विद्यालयले मेयर कप लिग खेल्नेछन् । राउण्ड रोबिनका आधारमा लिग चरणका खेलहरु फागुन ४ गतेबाट सुरु हुने सहआयोजक चितवन जिल्ला क्रिकेट संघका अध्यक्ष सुदीप पियालेले जानकारी दिए । 

प्रतियोगिताको मूल प्रायोजक विज्ञ शिक्षा र बिजा सर्भिसेजले प्रतियोगितामा सहभागी १० सामुदायिक विद्यालयलाई आवश्यक खेल सामग्री र खेल जर्सी उपलब्ध गराउन थालेको छ । आयोजक भरतपुर महानगरपालिकाले आगामी चैत ११ गते आयोजना गरेको कार्यक्रममा चितवनका प्रबन्ध निर्देशक डिल्लीराम अधिकारीले खेलकुदका सामाग्री र जर्सी हस्तान्तरण गरेको जानकारी दिए । महानगरलाई विज्ञहरुले रु ८ लाख ६० हजार बराबरको खेल सामग्री र जर्सी हस्तान्तरण गरेका छन् । 

ग्रासरुट क्रिकेटको विकास गर्न भरतपुर महानगरपालिकाले आफ्नो वार्षिक बजेटमा मेयर कप समावेश गरेको छ । भरतपुर महानगरपालिकाकी मेयर रेणु दाहालले यसलाई निरन्तर विस्तार गर्ने योजना रहेको बताएकी छन् ।