काठमाडौं । सर्वोच्च अदालतले नेपाली कांग्रेसका पूर्वसभापति तथा पूर्वप्रधानमन्त्री शेरबहाद र देउवा दम्पत्तीलाई पक्राउ नगर्न अन्तरिम आदेश दिएको छ । सम्पत्ति शुद्धीकरणमा पक्राउ पूजी जारी गरिएको विरुद्ध देउवा दम्पत्तीको तर्फबाट दायर रिटको सुनुवाइ गर्दै सोमबार यस्तो आदेश आएको हो । 

सर्वोच्च अदालतमा न्यायाधीशद्वय महेश शर्मा पौडेल र नित्यानन्द पाण्डेयको संयुक्त इजलासमा भएको बहसपछि सम्पत्ति शुद्धीकरण अनुसन्धान विभागबाट अनुसन्धान भएको कसुरको मुद्दा हेर्ने क्षेत्राधिकार विशेष अदालतमा रहेको ठहर गर्दै क्षेत्राधिकार भन्दा बाहिर नजान सचेत गराइएको छ । सर्वोच्चले अध्यादेश जारी हुनुपुर्व काठमाडौं जिल्ला अदालतबाट २०८२ चैत १४ मा जारी पक्राउ पुर्जी स्वतः निष्क्रिय हुने ठहर समेत गरेको छ । 

देशमा प्रतिनिधिसभाको निर्वाचनभन्दा एक हप्ता अगाडि देउवा दम्पत्ती थाइल्याण्ड उडेका थिए । उपचारको लागि भन्दै बैंकक पुगेका उनीहरु अहिले हङकङमा छन् । 

नेपालमा पक्राउ गर्ने गरी तयारी गरिएपछि आफू अनुसन्धानमा सहयोग गर्न तयार रहेको, सम्पत्तिको स्रोत देखाउन मन्जुर रहेको र पक्राउ गर्नुपर्ने अवस्था नरहेको जिकिर गर्दै उनीहरुको सर्वोच्चमा रिट दायर गरिएको थियो । सरकारले देउवाविरुद्ध रेडकर्नर नोटिस जारी गरेर इन्टरपोलमार्फत पक्राउ गर्ने तयारीसमेत गरेको थियो ।