काठमाडौं । इरानले बहराइनस्थित अमेरिकी नौसेनाको फिफ्थ फ्लिटमा ड्रोन हमला गरेको छ । इरानको इस्लामिक सेना रिभोल्युसनरी गार्ड कर्प्स (आईआरजीसी) ले गएराति उक्त हमला गरेको दाबी गरेको हो । 

इरानी सरकारी सञ्चार माध्यमहरुले जनाए अनुसार दक्षिण इरानको केशम र बन्दर अब्बासमा भएको अमेरिकी हमलाको बदलामा इरानले पनि जवाफी हमला गरेको छ । आईआरजीसीले अमेरिकाले जास्क, सिरिक र केशम द्विपमा हमला गरेको दाबी गर्दै उक्त हमलामा सिरिकमा एक सञ्चार टावरमा क्षति पुगेको र दुईवटा पानीका ट्यांकीसमेत क्षतिग्रस्त बनेको बताएको छ ।

यसैबीच, इरानले अमेरिकी सैन्य कारबाही जारी रहेमा जवाफ पनि जारी रहने र थप कडा कारबाही गर्ने चेतावनी दिएको छ । आईआरजीसीका अनुसार दुवैपक्षबीच टकराब अझै समाप्त भएको छैन ।

इरानले हमला गरेको बताए पनि अमेरिकी सेनाले बहराइनस्थित फिफ्थ फ्लिटमा हमला गरेको पुष्टि गरेको छैन । बहराइनमा तैनाथ अमेरिकी फिफ्थ फ्लिट पश्चिम एसियामा अमेरिकाको सबैभन्दा महत्त्वपूर्ण नौसैनिक अड्डा मानिन्छ । यसले फारसको खाडी, अरब सागर र स्ट्रेट अफ होर्मुजजस्ता रणनीतिक समुद्री इलाकाको निगरानी गर्छ ।