काठमाडौं । विश्वकप फुटबलअन्तर्गत आइभरीकोस्टले रोमाञ्चक जित हात पारेको छ । अमेरिकामा सम्पन्न खेलमा इक्वेडरलाई १–० ले पराजित गर्दै आइभरीकोस्टले महत्वपूर्ण तीन अंक जोडेको हो । 

प्रतिस्पर्धात्मक बनेको खेलको पहिलो हाफ गोलरहित बराबरीमा सकिएको थियो । दोस्रो हाफमा दुवै टोलीले गोलका अवसर सिर्जना गरे पनि निर्धारित समयको अन्त्यसम्म जाली चुमाउन सकेका थिएनन् ।  
 

खेल बराबरीतर्फ उन्मुख भइरहेका बेला अमाड डियालो नायक बने । उनले ९०औँ मिनेटमा निर्णायक गोल गर्दै आइभरीकोस्टलाई महत्वपूर्ण जित दिलाए । 

डियालोको अन्तिम क्षणको गोलसँगै इक्वेडर निराश बनेको थियो । यस जितपछि आइभरीकोस्टले प्रतियोगितामा विजयी सुरुआत गर्दै तीन अंक आफ्नो खातामा थपेको छ ।