काठमाडौं । आयोजक राष्ट्र अमेरिकामाथि प्रभावशाली जित निकाल्दै बेल्जियम विश्वकप फुटबलको क्वार्टरफाइनलमा प्रवेश गरेको छ । अन्तिम १६ को खेलमा बेल्जियमले अमेरिकालाई ४–१ ले पराजित गर्दै अन्तिम आठमा स्थान सुरक्षित गरेको हो । 

बेल्जियमको जितमा चार्ल्स डे केटेलारेले दुई गोल गरे भने ह्यान्स भानाकेन र रोमेलु लुकाकुले एक–एक गोल थपे । खेलको नवौँ मिनेटमै चार्ल्स डे केटेलारेले गोल गर्दै बेल्जियमलाई अग्रता दिलाएका थिए । 

अमेरिकाका मलिक टिलम्यानले ३१औँ मिनेटमा गोल फर्काएर खेल १–१ को बराबरीमा ल्याए । तर त्यसको दुई मिनेटपछि नै चार्ल्सले व्यक्तिगत दोस्रो गोल गर्दै बेल्जियमलाई पुनः २–१ को अग्रता दिलाए ।

दोस्रो हाफको ५७औँ मिनेटमा ह्यान्स भानाकेनले गोल गर्दै बेल्जियमको अग्रता ३–१ मा विस्तार गरे । त्यसपछि इन्जुरी समयमा रोमेलु लुकाकुले अर्को गोल थपेपछि बेल्जियमले ४–१ को सहज जित दर्ता गर्यो ।

यस हारसँगै आयोजक राष्ट्र अमेरिका प्रतियोगिताबाट बाहिरिएको छ । यसअघि सह–आयोजक क्यानडा र मेक्सिको पनि बाहिरिसकेका थिए। त्यससँगै यस संस्करणका तीनवटै आयोजक राष्ट्रको यात्रा समाप्त भएको छ ।

अब क्वार्टरफाइनलमा बेल्जियमले स्पेनको सामना गर्नेछ । स्पेनले अन्तिम १६ मा पोर्चुगललाई पराजित गर्दै अन्तिम आठमा स्थान बनाएको थियो ।