काठमाडौं । स्पेनले बेल्जियममाथि रोमाञ्चक जित निकाल्दै फिफा विश्वकप फुटबलको सेमिफाइनलमा स्थान सुरक्षित गरेको छ । शनिबार बिहान लस एन्जलस स्टेडियममा भएको क्वार्टरफाइनलमा स्पेनले बेल्जियमलाई २–१ गोलले पराजित गर्दै अन्तिम चारमा आफ्नो स्थान बनाएको हो । यससँगै स्पेन १६ वर्षपछि विश्वकपको सेमिफाइनलमा पुग्न सफल भएको छ ।

सन् २०१० मा विश्वकपको उपाधि जितेको स्पेन त्यसयता अपेक्षाअनुसारको प्रदर्शन गर्न सकेको थिएन । २०१४ मा समूह चरणबाटै बाहिरिएको स्पेन २०१८ र २०२२ संस्करणमा भने अन्तिम १६ बाटै प्रतियोगिताबाट बाहिरिएको थियो। यसपटक भने टोलीले सशक्त प्रदर्शन गर्दै उपाधि यात्रालाई निरन्तरता दिएको छ ।

स्पेनको जितमा फेबियन रुइज र मिकेल मेरिनोले एक–एक गोल गरे । बेल्जियमका चार्ल्स डे केटलेरले टोलीका लागि सान्त्वना गोल फर्काएका थिए ।

खेलको ३०औँ मिनेटमा रुइजले गोल गर्दै स्पेनलाई अग्रता दिलाएका थिए । तर पहिलो हाफ सकिनुअघि ४१औँ मिनेटमा डे केटलेरले गोल गर्दै बेल्जियमलाई १–१ को बराबरीमा ल्याए ।

खेल बराबरीतर्फ अघि बढिरहेको अवस्थामा ८८औँ मिनेटमा मेरिनोले निर्णायक गोल गर्दै स्पेनलाई २–१ को महत्वपूर्ण जित दिलाए ।

अब स्पेनले फाइनल प्रवेशका लागि सेमिफाइनलमा फ्रान्ससँग प्रतिस्पर्धा गर्नेछ ।