राजकुमार भट्टराई

खोटाङ -  खोटाङको ऐसेलुखर्क गाउँपालिकामा १६३ वर्षअघि बनाइएको लाखेको मुकुट चित्रण गर्ने मूर्ति अनावरण गरिएको छ । ऐसेलुखर्क गाउँपालिका ३ ऐसेलुखर्क बजारमा बिक्रम संवत १९१८ सालमा बनाइएको मुखुण्डोको चित्रण गर्ने लाखेको मूर्ति अनावरण गरिएको हो । ऐसेलुखर्क गाउँपालिकाले उपलव्ध गराएको १६ लाखमा निर्माण गरिएको ढलौटको मूर्ति गाउँपालिका अध्यक्ष गिरेन्द्रबहादुर राईले अनावरण गरिएको हो । गाउँपालिकाबाट अनुदान पाएपछि नेवार सामाजिक गुठीले लाखेको ऐतिहासिक मुकुटको झल्को दिने मूर्ति बनाएको हो । 

ऐतिहासिक मुकुटको स्मरण र सम्मानमा लाखेको मूर्ति बनाएर राखिएको ऐसेलुखर्क गाउँपालिका ३ ऐसेलुखर्कका वडाध्यक्ष टेकेन्द्र राजभण्डारीले बताउछन । लाखेको मूर्ति राखेसँगै सो स्थानलाई लाखेचोक नामाकरण गरिएको छ । सबै समुदायको पहिचान झल्काउने प्रतिमूर्ति स्थापना गर्ने निर्णय अनुसार नेवार समुदायको लाखेको मूर्ति अनावरण गरिएको गाउँपालिका अध्यक्ष राईले बताएका छन  । 

ऐसेलुखर्क बजारमा विक्रम संवत १९१८ सालदेखि नेवार समुदायको बसोबास भएको हो । त्यही साल ऐसेलुखर्क देसारे निवासी श्रेष्ठ थरका कालीगढले घरेलु औजार प्रयोग गरेर गुराँसको काठबाट लाखेको मुकुट बनाएका थिए । अहिले सोही मुकुटको चित्रण गर्ने मूर्ति बनाइएको हो । मूर्ति निर्माणका लागि गाउँपालिकाले आर्थिक वर्ष २०७९र८० मा ५ लाख र आर्थिक वर्ष २०८०र०८१ मा ११ लाख उपलव्ध गराएको नेवार सामाजिक गुठीका अध्यक्ष ध्रुव राजभण्डारीले बताउछन । ऐसेलुखर्कमा विक्रम संवत १९१८ सालदेखि बसोबास सुरु गरेको नेवार समुदायले विक्रम संवत १९३५ सालदेखि नागपञ्चमीदेखि श्रीकृष्ण जन्माष्टमीसम्म लाखेजात्रा मनाउन सुरु गरेको इतिहास पाइन्छ । 

                                                                                                                                                                                                        स्रोत : गोरखापत्र अनलाइन