काठमाडौं । गएको निर्वाचनमा कैलाली–२ बाट प्रतिनिधि सभा सदस्यमा निर्वाचित रास्वपाका सांसद केपी खानलको घर सरकारी जग्गामा रहेको भनेर अहिले सामाजिक सञ्जालमा भाइरल भएको छ । उनले लम्कीचुहा नगरपालिका–१ स्थित बसपार्कमा रहेको सरकारी जग्गामा घर बनाएको आरोप लागेको हो । 

शनिबारदेखि सामाजिक सञ्जालमा यो प्रकरण भाइरल भएपछि सरकारले सर्वसाधारणको घरमा जस्तै उनको घरमा पनि डोजर लगाएर भत्काउनु पर्ने आवाज व्यापक बनेको छ । सरकारले काठमाडौंसहित देशका विभिन्न स्थानमा सार्वजनिक तथा अतिक्रमित जग्गामा बनाइएका घर, टहरा लगायतका संरचनामा डोजर लगाइरहेका बेला उनको घर पनि भत्काउनु पर्ने आवाज व्यापक भएको हो । 

सांसद खनालको सचिवालयले भने देशभर अतिक्रमित संरचना हटाइरहेका बेला राजनीतिक प्रतिशोधका भरमा झुटो आरोप लगाएको दाबी गरेको छ । उनको सचिवालयमा रहेका हर्क पुनले खनालका बुबाआमाले भारतमा कमाएको पैसाले कैलालीको लम्कीमा घर बनाएको बताएका छन् । यद्यपी, सुदूरपश्चिमको तराई क्षेत्रमा धेरैजसो घरहरू ऐलानी जग्गामै रहेको उल्लेख गरेका छन् । जसले गर्दा सांसद खनालको पनि लालपूर्जा नभएको हुन सक्ने उनको भनाइ रहेकोछ  ।