काठमाडौं । काभ्रेको रोशी खोलामा ठूलो मानवीय संकट टरेको छ । सुरक्षाकर्मीको सक्रियताको कारण त्यहाँ मानवीय दुर्घटना हुन नपाएको हो । 

अविरल वर्षाका कारण रोशी खोलाको बहाव बढ्दा खोलाको बीच भागमा फसेका ८९ जना यात्रुहरूलाई सुरक्षाकर्मीले सकुशल उद्धार गरेका छन् ।

जिल्ला प्रहरी कार्यालय काभ्रेपलाञ्चोकका अनुसार आइतबार साँझदेखि परेको निरन्तर वर्षाले रोशी खोलामा पानीको बहाव उच्च भएपछि पाँचवटा माइक्रोबस बीच खोलामा अड्किएका थिए । ती सवारीमा सवार ८९ जना यात्रुहरूलाई नेपाल प्रहरी तथा अन्य सुरक्षा निकायको संयुक्त टोलीले मंगलबार राति करिब १ बजे उद्धार गरी सुरक्षित रूपमा गन्तव्यतर्फ पठाएको हो ।

उद्धार कार्यपछि प्रहरीले लापरवाहीपूर्वक सवारी सञ्चालन गरी यात्रुको ज्यान र सम्पत्तिमा जोखिम सिर्जना गरेको आरोपमा पाँचवटै माइक्रोबसका चालकलाई नियन्त्रणमा लिएको जनाएको छ । उनीहरूलाई जिल्ला प्रहरी कार्यालय काभ्रेपलाञ्चोकको हिरासतमा राखी थप अनुसन्धान भइरहेको प्रहरीले जानकारी दिएको छ । बीपी राजमार्ग अन्तर्गत पर्ने उक्त रुटमा यातायात आवागमनमा प्रतिबन्ध लगाइएको थियो । त्यसका बावजुद पनि चालकले अटेर गरी सवारी साधन चलाएका थिए ।