काठमाडौं । अमेरिकाले रुस र युक्रेनबीचको युद्ध तीन दिनका लागि रोक्ने घोषणा गरेको छ । राष्ट्रपति डोनाल्ड ट्रम्पले जारी युद्ध मे ९ देखि ११ सम्म युद्धविरामको घोषणा गरेका हुन् । 

युद्धविरामको घोषणासँगै ट्रम्पले युद्धविराम अवधिमा दुई देशबिच हजार कैदी आदानप्रदान गरिने जानकारी पनि दिएका छन् । 

ट्रम्पले ट्रुथ सोसलमा लेखेका छन्, ‘म यो घोषणा गर्न पाउँदा खुसी छु– रुस र युक्रेनबिच मे ९, १० र ११ तीन दिन युद्धविराम हुनेछ। रुसले विजय दिवस मनाउँदै छ र युक्रेनले पनि मनाउँदै छ, किनकि उनीहरू पनि दोस्रो विश्वयुद्धका हिस्सा हुन् ।’

उनले अगाडि लेखेका छन्, ‘यस युद्धविराममा लडाइँका सबै गतिविधि रोक्ने र दुवै देशका हजार कैदी आदानप्रदान हुनेछ । मेरो अनुरोध स्वीकार गरेकामा म राष्ट्रपति भ्लादिमिर पुटिन र राष्ट्रपति भोलोदिमिर जेलेन्स्कीप्रति आभारी छु ।’

ट्रम्पले यो युद्धविराम लामो, घातक र कठिन युद्ध अन्त्यको सुरुवात हुने विश्वास पनि व्यक्त गवरेका छन् । 

उनले भनेका छन्, ‘यो दोस्रो विश्वयुद्धपछिको सबैभन्दा ठुलो द्वन्द्व हो र यसलाई अन्त्य गर्न वार्ता जारी छ ।’

अर्कातर्फ अमेरिका र इरानबिच भने विवाद बढेको छ । दुवै पक्षले एकअर्कालाई युद्धविराम उल्लंघन गरेको आरोप लगाइरहेका छन् ।