काठमाडौं । राष्ट्रिय स्वतन्त्र पार्टी (रास्वपा)का सांसदहरुले कायम मुकायम प्रधानन्यायाधीश सपना प्रधान मल्ललाई राजनीति गर्ने मन भए कोट खोलेर आउन चुनौती दिएका छन् । प्रतिनिधिसभाका सांसद समीक्षा बाँस्कोटा र यज्ञमणि न्यौपानेले सोमबार यस्तो चुनौती दिएका हुन् । 

प्रतिनिधिसभाको बैठकमा विशेष समय माग्दै सांसदद्वय बाँस्कोटा र न्यौपानेले मल्लले संवैधानिक परिषद्को प्रधानन्यायाधीशमा सिफारिसविरुद्ध दायर दरपीठ निवेदन दर्ता गरेर पेसी तोक्न आदेश दिएपछि उनीहरूले आपत्ति जनाए । 

धिवक्तासमेत रहेका न्यौपानेले भने, ‘सर्वोच्च अदालत कामु प्रधानन्यायाधीश सपना प्रधान मल्लको आदेश भन्ने एउटा आदेश अहिले मिडियामा छरपस्ट आएको छ। यो आदेश इजलास संयुक्त हो कि, एकल हो कि, वा बृहत् इजलास हो कि, या पूर्ण इजलास हो कि, या संविधानको कुन धाराले गाइड गरेको इजलास हो, यहाँ देखिन्न । अदालतका आफ्ना मर्यादा र सीमा छन् ।’ 

कन्फ्लिक्ट अफ इन्ट्रेस्टको सिद्धान्त देखिने गरी अदालतको न्याय प्रशासनको विषयभन्दा बाहिर गएको भन्दै असन्तुष्टि जनाए । सांसद बाँस्कोटाले पनि मल्लको अभिव्यक्तिप्रति आपत्ति जनाइन् ।