काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले आज कोशी र मधेश प्रदेशका सांसदहरुसँग छलफल गर्ने भएका छन् । दुई प्रदेशमा प्रतिनिधित्व गर्ने काठमाडौं उपत्यकामा उपलब्ध सांसदहरुसँग सभापति लामिछानेले छलफल गर्न लागेका हुन् । 

पार्टी प्रवक्ता मनिष झाका अनुसार सभापति लामिछानेले सातवटै प्रदेशका सांसदहरुसँग छलफल गर्ने क्रममा आज दुई प्रदेशलाई रोजेका हुन् । उनले आज पहिलो चरणमा बिहान ११ बजे कोशी प्रदेशका सांसदसँग छलफल गर्नेछन् । 

कोशी प्रदेशका सांसदहरूसँगको छलफलपछि मधेश प्रदेशका सांसदसँग छलफल गर्ने तय भएको  छ । मधेश प्रदेशका सांसदसँग दिउँसो साढे १ बजे छलफल हुनेछ ।

संसदमा प्रधानमन्त्रीको खोजी गर्दै विपक्षी दलहरूले दबाब सिर्जना गरेका छन् । त्यसले रास्वपा पनि दबाबमा परेको देखिन्छ । त्यसका साथै बजेट आउन लागेका कारण पनि सांसदहरूसँग रास्वपाले छलफल गर्न लागेको हो । मुख्यगरी संसद र बजेटसँग सांसदहरूको सुझाव लिनका लागि सभापति लामिछानेले छलफल गर्न लागेको बताइएको छ ।