काठमाडौं । सत्तारुढ दल राष्ट्रिय स्वतन्त्र पार्टी (रास्वपा)ले एकजना जिल्ला सभापतिलाई हटाएको छ । पार्टीको केन्द्रीय अनुशासन आयोगको सिफारिसमा बारा जिल्ला सभापति चन्दन स्वर्णकारको सदस्यता नै खारेज गरिएको हो । 

केन्द्रीय संगठन विभागका सचिव शंकर श्रेष्ठले स्वर्णकारलाई एक पत्र लेखी उनको सदस्यता खारेज गरिएको जानकारी दिएका छन् । पत्रमा २०८३ बैशाख ३० गतेको पार्टी केन्द्रीय बैठकको निर्णय अनुसार उनको सदस्यता खारेज भएको उल्लेख गरिएको छ भने उनलाई दिएको पत्रको बोद्धार्थ मधेश प्रदेश समिति र जिल्ला समति सर्लाहीलाई पनि दिइएको छ । 

गएको फागुन २१ गते सम्पन्न भएको प्रतिनिधिसभाको निर्वाचनमा बारा जिल्लाबाट निर्वाचित सांसदहरुले उनीविरुद्ध उजुरी दिएका थिए । जिल्ला सभापति स्वर्णकारले आर्थिक अनियमिता, पार्टी संगठन परिचालन नगरेको, विपक्षी दलका उम्मेदवारको पक्षमा लागेको आरोप उनीमाथि थियो । त्यही आरोप र उजुरीको आधारमा उनीमाथि कारबाही गरिएको बुझिएको छ । 

कारबाहीको पत्र पाएपछि स्वर्णकारलाई सामाजिक सञ्जालमार्फ सार्वजनिक गर्दै आफ्नो राजनीतिक जीवनको हत्या भएको गुनासो गरेका छन् । ‘मेरो राजनीतिक हत्या भयो, अब फैसला महागढीमाई र बाराका जनताको हातमा । आदरणीय आम जनसमुदाय, षड्यन्त्रको पराकाष्ठा कस्तो हुन्छ भन्ने कुराको अन्तिम प्रमाण यही पत्र हो ।’–उनले लेखेका छन् ।