राष्ट्रिय बाल अधिकार परिषद्ले भक्तपुरको सूर्यविनायक–८, सिपाडोलस्थित ‘मुस्कान सेवा नेपाल’ बाल गृहबाट २ बालक र ६ बालिका गरी ८ जना बालबालिकाको उद्धार गरेको छ। 

उक्त बाल गृहले सञ्चालन मापदण्ड पालना नगरेको र बालबालिका जोखिममा पर्न सक्ने अवस्था देखिएकाले जेठ २८ गते उद्धार गरी सुरक्षित स्थानमा पुनःस्थापना गरिएको हो। 

परिषद्ले कानुनविपरीत बाल गृह सञ्चालन गर्नु दण्डनीय अपराध भएको उल्लेख गर्दै अनुमति बिना वा मापदण्ड पूरा नगरी सञ्चालन गरिए कडा कारबाही हुने चेतावनी दिएको छ। 

साथै, मापदण्डविपरीत सञ्चालन भएका बाल गृहबारे सम्बन्धित निकायलाई जानकारी गराउन र स्थानीय निकायलाई नियमित अनुगमन गर्न आग्रह गरिएको छ।