काठमाडौं । अन्तर्राष्ट्रिय फुटबल महासंघ (फिफा) ले अखिल नेपाल फुटबल संघ (एन्फा) लाई अनिश्चितकालका लागि निलम्बन गरेको छ । फिफा काउन्सिल ब्युरोले जारी गरेको निर्णयअनुसार फिफा विधानको धारा १६ बमोजिम एन्फाको सदस्यता निलम्बन गरिएको हो । 

फिफाले एन्फाको कामकारबाहीमा तेस्रो पक्षको हस्तक्षेप भएको ठहर गर्दै यो कदम चालेको जनाएको छ । निलम्बनसँगै एन्फाले फिफाको सदस्यका रूपमा प्राप्त गर्दै आएका सबै अधिकार गुमाएको छ भने नेपाली फुटबल अन्योल र अनिश्चितताको अवस्थामा पुगेको छ ।

यस निर्णयपछि एन्फा, त्यसअन्तर्गतका राष्ट्रिय टोली, क्लब तथा पदाधिकारीहरूले फिफा र एशियाली फुटबल महासंघ (एएफसी) अन्तर्गत सञ्चालन हुने अन्तर्राष्ट्रिय प्रतियोगिता तथा गतिविधिमा सहभागी हुन पाउने छैनन् ।

यस्तै, फिफाबाट प्राप्त हुँदै आएको आर्थिक, प्राविधिक तथा विकाससम्बन्धी सहयोगसमेत प्रभावित हुने भएको छ । फिफाको यस निर्णयले नेपाली फुटबलको अन्तर्राष्ट्रिय सहभागिता र विकास प्रक्रियामा प्रत्यक्ष असर पार्ने देखिएको छ ।