काठमाडौं । मनसुनी प्रणालीको प्रभावका कारण देशभर मौसम बदली भई आज विभिन्न प्रदेशमा वर्षाको सम्भावना रहेको छ । जल तथा मौसम विज्ञान विभागका अनुसार गण्डकी र लुम्बिनी प्रदेशका बाँकी भूभागसँगै कर्णाली र सुदूरपश्चिम प्रदेशभर मनसुन पूर्ण रूपमा फैलिएको छ ।

हाल लुम्बिनी, कर्णाली र सुदूरपश्चिम प्रदेशका अधिकांश क्षेत्रमा घना बादल लागेको छ भने कोशी, मधेश, बागमती र गण्डकी प्रदेशमा पनि आंशिकदेखि सामान्य बदली रहेको छ । बागमती, लुम्बिनी, कर्णाली र सुदूरपश्चिमका केही स्थान तथा कोशी प्रदेशका एक–दुई स्थानमा मेघगर्जन र चट्याङसहित मध्यम वर्षा भइरहेको विभागले जनाएको छ ।

विभागका अनुसार आज दिउँसो देशभर सामान्यदेखि पूर्ण बदली रहनेछ । हिमाली क्षेत्रका केही स्थानमा वर्षासँगै हिमपात हुन सक्ने सम्भावना छ । पहाडी क्षेत्रका धेरै स्थान तथा तराईका केही स्थानमा मेघगर्जन र चट्याङसहित मध्यम वर्षा हुने अनुमान गरिएको छ ।

विशेषगरी कोशी, बागमती, गण्डकी, लुम्बिनी र कर्णाली प्रदेशका पहाडी जिल्लाका एक–दुई स्थानमा भारी वर्षा हुन सक्ने भएकाले सतर्कता अपनाउन विभागले आग्रह गरेको  छ।

आज राति पनि मौसम पूर्ण रूपमा बदली रहने पूर्वानुमान गरिएको छ । हिमाली क्षेत्रका केही स्थानमा वर्षा र हिमपात, पहाडी क्षेत्रका केही स्थान तथा तराईका थोरै स्थानमा मेघगर्जन र चट्याङसहित वर्षा हुने सम्भावना छ ।

रातिको समयमा कोशी, बागमती र लुम्बिनी प्रदेशका पहाडी भूभागका एक–दुई स्थानमा भारी वर्षा हुन सक्ने भएकाले नदी–खोला आसपास, पहिरोको जोखिम भएका क्षेत्र तथा यात्रा गर्नेहरूले आवश्यक सावधानी अपनाउन विभागले सुझाव दिएको छ ।