काठमाडौं । प्रहरीले सुदुरपश्चिमको कञ्चनपुरका पत्रकार खेम भण्डारी पक्राउ गरेको छ । पत्रकार भण्डारीलाई जिल्ला प्रहरी कञ्चनपुरको टोलीले आज बिहान जिल्लाको भीमदत्त नगरपालिका–१८ बाट पक्राउ गरेको हो । 

उच्च अदालतको फैसला कार्यान्वयनका लागि भण्डारीलाई पक्राउ गरिएको प्रहरीको भनाइ रहेको छ । १३ वर्षीया बालिका निर्मला पन्त बलात्कार–हत्या प्रकरणका विषयमा गाली बेइज्जतीको मुद्दामा दोषी ठहर गर्दै भण्डारीलाई उच्च अदालतले एक महिना सात दिन कैदको फैसला सुनाएको थियो ।

यसअघि पत्रकार भण्डारीलाई एक महिना कैदका साथै १० हजार रुपैयाँ जरिवाना र एक लाख रुपैयाँ क्षतिपूर्ति तिराउने फैसला जिल्ला अदालतले गरेको थियो ।

उच्चले एक महिना सात दिन कैद, १२ हजार एक सय रुपैयाँ जरिवाना र एक लाख रुपैयाँ क्षतिपूर्तिको फैसला गरेको हो ।

निर्मला पन्त प्रकरणमा तथ्यहीन रूपमा आफूलाई जोड्दै समाचार लेखेको भन्दै कञ्चनपुरका तत्कालीन एसपी दिल्लीराज विष्टका छोरा किरण विष्टले उनीविरुद्ध मुद्दा दायर गरेका थिए ।