काठमाडौं । मेलम्ची खानेपानी आयोजनाको मुहान क्षेत्रमा बाढी प्रवेश गरेपछि काठमाडौं उपत्यकामा वितरण हुँदै आएको मेलम्चीको खानेपानी शुक्रबारदेखि अस्थायी रूपमा बन्द गरिएको छ । काठमाडौं उपत्यका खानेपानी लिमिटेड (केयूकेएल) का अनुसार लगातारको वर्षापछि मुहानको पानी अत्यधिक धमिलो बनेकाले प्रशोधन प्रक्रिया प्रभावित भएको हो । 

त्यसका कारण मेलम्चीबाट सुन्दरीजलस्थित प्रशोधन केन्द्रतर्फ पानीको प्रवाह अस्थायी रूपमा रोकिएको छ । केयूकेएलका अनुसार मुहानको पानीको गुणस्तरमा सुधार आएपछि पुनः प्रशोधन प्रक्रिया सञ्चालन गरिनेछ र पूर्वनिर्धारित तालिकाअनुसार काठमाडौं उपत्यकामा खानेपानी वितरण सुरु गरिनेछ ।

केयूकेएलका प्रवक्ता वीरबहादुर चन्दले वर्षा निरन्तर जारी रहेमा मुहानको पानी सफा हुन समय लाग्न सक्ने भएकाले काठमाडौंमा नियमित खानेपानी आपूर्ति पुनः सञ्चालन हुन केही समय लाग्न सक्ने बताए ।