काठमाडौं । काठमाडौंको बुद्धनगर क्षेत्रमा डेरा गरी बस्दै आएका एक पुरुषले शनिबार बिहान आत्मदाहको प्रयास गरेका छन् । प्रहरीका अनुसार बिहान करिब ६ः२० बजे ४५ वर्षीय अस्विन राउतले आफ्नै कोठाभित्र शरीरमा आगो लगाएर आत्मदाहको प्रयास गरेका हुन् । 

घटनाबारे सूचना प्राप्त हुनासाथ प्रहरी टोली घटनास्थल पुगेर उनको उद्धार गरेको थियो । उनी घाइते अवस्थामा फेला परेपछि तत्काल उपचारका लागि वीर अस्पताल पठाइएको प्रहरीले जनाएको छ । हाल उनको उपचार भइरहेको छ भने घटनाको कारणबारे प्रहरीले थप अनुसन्धान अघि बढाएको छ ।

पछिल्ला केही दिनयता आत्मदाहका घटनाले चिन्ता बढाइरहेका छन् । बिहीबार काठमाडौंको त्रिपुरेश्वरमा एक व्यक्तिले आत्मदाहको प्रयास गरेका थिए, जसको उपचारका क्रममा मृत्यु भएको थियो । यस्तै, शुक्रबार सर्लाहीमा आत्मदाहको प्रयास गरेका अर्का एक पुरुषको कीर्तिपुरस्थित अस्पतालमा उपचार भइरहेको छ ।