काठमाडौं । लगातारको वर्षापछि बागमती नदीको जलस्तर बढ्दा काठमाडौंको कीर्तिपुर नगरपालिका–१० स्थित सुन्दरीघाटमा रहेको राधास्वामी सुकुम्बासी होल्डिङ सेन्टर डुबानमा परेको छ ।

बाढीको पानी होल्डिङ सेन्टरभित्र प्रवेश गरेपछि त्यहाँ अस्थायी रूपमा बसोबास गरिरहेका विस्थापित परिवारहरू सुरक्षित स्थानतर्फ सारिएका छन् । यससँगै उनीहरू फेरि एकपटक विस्थापनको मारमा परेका छन् ।

गृह मन्त्रालयका अनुसार प्रभावित क्षेत्रको अवस्थालाई मध्यनजर गर्दै सम्बन्धित विषयगत क्लस्टरहरू परिचालन गरिएको छ । प्रभावित परिवारका लागि तत्काल खाना, शुद्ध खानेपानी तथा अन्य अत्यावश्यक राहत सामग्री उपलब्ध गराउने काम भइरहेको मन्त्रालयले जनाएको छ ।

स्थानीय प्रशासनले नदी किनारका बासिन्दालाई सतर्क रहन तथा आवश्यक परे सुरक्षित स्थानमा जान आग्रह गरेको छ । साथै, वर्षा जारी रहेकाले बाढीको जोखिम अझ बढ्न सक्ने भन्दै सम्बन्धित निकायले अवस्थाको निरन्तर निगरानी गरिरहेको जनाएको छ ।