काठमाडौं । काठमाडौंको त्रिपुरेश्वरमा आत्मदाह गरेका मुगुका गणेश नेपालीको शव त्रिभुवन विश्वविद्यालय शिक्षण अस्पताल, महाराजगञ्जमा सारिएको छ ।

उपचारका क्रममा शुक्रबार वीर अस्पतालमा उनको मृत्यु भएपछि शव आफन्तलाई जिम्मा लगाउने तयारी गरिएको थियो । तर परिवारले शव बुझ्न अस्वीकार गरेपछि सुरक्षित राख्नका लागि महाराजगञ्जस्थित शिक्षण अस्पतालको शवगृहमा पठाइएको अस्पताल स्रोतले जनाएको छ ।

अस्पतालका अनुसार परिवारले जिम्मा नलिएसम्म शव शवगृहको शीत भण्डारण (फ्रिज) मा राखिनेछ ।

गणेश नेपालीले बिहीबार त्रिपुरेश्वरमा आफ्नै शरीरमा पेट्रोल छर्किएर आगो लगाएका थिए । गम्भीर घाइते भएका उनको वीर अस्पतालमा उपचार भइरहेको अवस्थामा शुक्रबार निधन भएको थियो ।

परिवारले घटनाप्रति असन्तुष्टि जनाउँदै आफ्नो माग सम्बोधन नभएसम्म शव नबुझ्ने अडान लिएको जनाएको छ । यस घटनाअघि मोटरसाइकल पार्किङको विषयमा महानगर प्रहरीसँग उनको विवाद भएको देखिने भिडियो सामाजिक सञ्जालमा सार्वजनिक भएको छ ।

यस घटनाको वास्तविक कारण र त्यससँग सम्बन्धित अन्य पक्षबारे सम्बन्धित निकायले अनुसन्धान गरिरहेको छ ।