काठमाडौं । मिटरब्याज पीडितहरूले न्यायको माग गर्दै जनकपुरबाट सुरु गरेको पैदल न्याय मार्च चौथो दिन पनि निरन्तर अघि बढेको छ । २५ असारदेखि सुरु भएको यात्रा आज सर्लाहीको लालबन्दीबाट काठमाडौंतर्फ अगाडि बढाइएको हो ।

आयोजकका अनुसार राज्यको ध्यानाकर्षण गराउँदै मिटरब्याज पीडितका समस्या समाधान र विगतका सहमति कार्यान्वयन गराउन दबाब सिर्जना गर्ने उद्देश्यले सुरु गरिएको यो मार्च काठमाडौं नपुगेसम्म नरोकिनेछ ।

मार्चमा सहभागी सयौँ पीडितहरूले ‘चुपचाप तमसुक फाड’, ‘अधिकार माग्न काठमाडौं जान पर्दैन’ लगायतका नारासहितका प्लेकार्ड बोकेर सरकारसँग न्यायको माग गरिरहेका छन् । उनीहरू दैनिक करिब २० देखि २६ किलोमिटर पैदल यात्रा गर्दै राजधानीतर्फ अघि बढिरहेका छन् ।

आन्दोलनकारीहरूको भनाइमा सरकारले मिटरब्याज पीडितसँग यसअघि चारपटक विभिन्न सहमति गरे पनि ती कार्यान्वयन नभएकाले फेरि आन्दोलनको बाटो रोज्न बाध्य भएको हो । उनीहरूले सरकारले तत्काल प्रतिबद्धता कार्यान्वयन गरी पीडितलाई न्याय दिनुपर्ने माग गरेका छन् ।

आयोजकका अनुसार यात्रा निर्धारित तालिकाअनुसार अघि बढिरहेको छ र करिब एक साताभित्र काठमाडौं पुगेर थप दबाबमूलक कार्यक्रम सञ्चालन गरिनेछ ।