काठमाडौं । नेपाल आयल निगमले आजदेखि देशभर १४.२ केजी तौल भएको पूर्ण ग्यास सिलिण्डर बिक्री–वितरण सुरु गरेको छ । निगमले मंगलबार विज्ञप्ति जारी गर्दै पुरानै तौलका भरी सिलिण्डर पुनः बजारमा पठाउने निर्णय भएको जनाएको हो ।

निगमका अनुसार पछिल्लो समय ग्यास आपूर्तिमा देखिएका प्राविधिक तथा व्यवस्थापकीय समस्या क्रमशः समाधान हुँदै गएका छन् । साथै, भारतीय आयल कर्पोरेसन (आईओसी) का विभिन्न बोटलिङ प्लान्ट र रिफाइनरीबाट हुने ग्यास लोडिङमा समेत उल्लेखनीय सुधार आएको छ ।

उपभोक्ताबाट १४.२ केजीकै पूर्ण तौलको ग्यास सिलिण्डरको माग उच्च रहेकाले आधा तौलको सट्टा पुरानै मापदण्डअनुसारका सिलिण्डर देशभरका डिपो र आधिकारिक विक्रेतामार्फत उपलब्ध गराउने निर्णय गरिएको निगमले जनाएको छ ।

नयाँ व्यवस्था बुधबारदेखि नै देशभर लागू भएको निगमको भनाइ छ ।

निगमले पूर्ण तौलको एलपी ग्यास सिलिण्डरको उपभोक्ता मूल्य प्रतिसिलिण्डर २ हजार ६० रुपैयाँ कायम रहने स्पष्ट पारेको छ ।

निगमका अनुसार यो व्यवस्थाले बजारमा ग्यास आपूर्ति सहज बनाउन र विशेषगरी बढी माग हुने समयमा उपभोक्तालाई राहत पुग्ने अपेक्षा गरिएको छ ।