काठमाडौं । अविरल वर्षासँगै आएको बाढी र पहिरोका कारण देशका विभिन्न क्षेत्रमा सडक सञ्जाल प्रभावित भएको छ । नेपाल प्रहरीले दिएको जानकारीअनुसार आज देशभरका ८ वटा प्रमुख सडक पूर्ण रूपमा अवरुद्ध भएका छन् भने ६ वटा सडकमा एकतर्फी मात्र सवारी सञ्चालन भइरहेको छ ।

इलाम नगरपालिका–९ राजदुवाली क्षेत्रमा मेची राजमार्गमा पहिरो खस्दा झापा–ताप्लेजुङ सडकखण्डमा सवारी आवागमन ठप्प भएको छ । यद्यपि, स्थानीय वैकल्पिक मार्ग प्रयोग गरी सीमित रूपमा सवारी सञ्चालन भइरहेको प्रहरीले जनाएको छ ।

यसैबीच, सम्भावित बाढीको जोखिमलाई मध्यनजर गर्दै बीपी राजमार्गमा सवारी आवागमन रोकिएको छ । पहिरोका कारण कान्ति लोकपथ पनि पूर्ण रूपमा अवरुद्ध बनेको छ ।

त्यसैगरी, सिन्धुपाल्चोकस्थित अरनिको राजमार्ग, अर्घाखाँचीको सालझण्डी–ढोरपाटन सडक तथा गुल्मीको रुद्रवेणी सडकमा पनि बाढीपहिरोका कारण यातायात सेवा प्रभावित भएको छ ।

यता, केही सडकमा भने एकतर्फी रूपमा मात्रै सवारी सञ्चालन भइरहेको छ । भोजपुरको मध्यपहाडी राजमार्ग, मकवानपुरको भीमफेदी क्षेत्रस्थित कान्ति लोकपथ, कास्कीको नयाँपुल–घान्द्रुक सडक, बागलुङको मध्यपहाडी लोकमार्ग तथा गुल्मीको कालीगण्डकी करिडोरमा सावधानीपूर्वक एकतर्फी यातायात सञ्चालन गरिएको प्रहरीले जनाएको छ ।

प्रहरीले वर्षायाममा अनावश्यक यात्रा नगर्न, यात्रा गर्नैपरे सडकको अवस्था बुझेर मात्र गन्तव्यतर्फ प्रस्थान गर्न तथा सम्बन्धित निकायको सूचना पालना गर्न सर्वसाधारणलाई आग्रह गरेको छ ।