काठमाडौं । नारायणगढ–मुग्लिन सडकखण्डको जलविरे क्षेत्रमा दुई वटा बस आपसमा ठोक्किँदा सडक पूर्ण रूपमा अवरुद्ध भएको छ ।

सडक डिभिजन कार्यालय भरतपुरका अनुसार दुर्घटनापछि दुवैतर्फ सवारीसाधन रोकिएका छन् । दुर्घटनास्थलमा प्रहरी र उद्धार टोली पुगेर सडक खुलाउने तथा सवारी व्यवस्थापनको काम गरिरहेका छन् ।

यसअघि अविरल वर्षाका कारण पहिरोको जोखिम बढेपछि शनिबार राति १० बजेदेखि उक्त सडकखण्डमा सवारी आवागमन रोकिएको थियो । आइतबार बिहानदेखि भने सडक सञ्चालनमा ल्याइएको थियो ।

तर, जलविरे क्षेत्रमा दुई बस एकापसमा ठोक्किएपछि सडक पुनः अवरुद्ध भएको सडक डिभिजन कार्यालय भरतपुरले जनाएको छ ।

सडक खुलाउन आवश्यक प्रयास भइरहेको जनाइएको छ । यात्रुहरूलाई वैकल्पिक व्यवस्था अपनाउन तथा सम्बन्धित निकायको सूचनालाई ध्यान दिएर मात्रै यात्रा गर्न आग्रह गरिएको छ ।