काठमाडौँ । डा. गोविन्द केसीको २४औँ सत्याग्रहको तेस्रो दिन स्वास्थ्य अवस्था बिस्तारै कमजोर बन्दै गएको छ । अनशनरत डा. केसीको रगतमा ग्लुकोजको मात्रा घटेर शनिबार बिहान ५० मिलिग्राम प्रतिडेसिलिटरमा झरेको छ।  उनको रक्तचापमा समेत तीव्र उतारचढाव देखिएको चिकित्सकहरूले बताएका छन् ।

मांसपेशी बाउँडिने र बोल्न गाह्रो हुनेजस्ता समस्या थपिएका छन् । अनशन सुरु गर्नुअघि नै खुट्टाको शल्यक्रिया गरिएकाले उनलाई हिँडडुल गर्न तथा शौचालय जानसमेत कठिन भइरहेको छ ।

उनको स्वास्थ्यको निरन्तर निगरानी र थप स्वास्थ्य परीक्षणका लागि सेती प्रादेशिक अस्पतालका फिजिसियन डा. जगेन्द्र दुवालको नेतृत्वमा गठित चिकित्सकीय टोली खटिएको छ ।

यसैबीच, डा. केसीले उठाएका माग सम्बोधन गर्न सरकारले संवादको पहल थालेको छ । शिक्षामन्त्री विद्या भट्टराईले शुक्रबार साँझ डा. अमृत जैसी र राति ११ बजे डा। केसीसँग टेलिफोनमार्फत कुराकानी गरेकी थिइन् ।

संवादका क्रममा डा. केसीले सहिद दशरथ चन्द स्वास्थ्य विज्ञान विश्वविद्यालयका पदाधिकारीलाई बर्खास्त गर्नुपर्ने तथा गेटामा तत्काल ३०० शय्याको पूर्णकालीन अस्पताल सञ्चालन गर्नुपर्नेलगायतका माग अघि सारेका छन् ।  

उनले आफ्ना माग सम्बोधन गर्ने गरी आवश्यक गृहकार्यसहित वार्तामा आउन सरकारलाई आग्रह गरेका छन् ।