काठमाडौँ । सुनसरीको देवानगञ्ज गाउँपालिका–३ स्थित कप्तानगञ्जमा हिन्दु र मुस्लिम समुदायबीच भएको झडपको घटनाबारे छानबिन गर्न गृह मन्त्रालयले समिति गठन गरेको छ । गृहमन्त्री सुधन गुरुङको अध्यक्षतामा सोमबार बसेको बैठकले मन्त्रालयका सहसचिवको नेतृत्वमा छानबिन समिति गठन गर्ने निर्णय गरेको हो । 

बिहान ९ बजेदेखि बसेको बैठकमा गृह मन्त्रालयका सचिवसहित सुरक्षा निकायका प्रमुखहरूको सहभागिता रहेको थियो । छानबिन समितिको नेतृत्व कसले गर्ने भन्ने टुंगो लागिसकेको छैन । समितिमा सुनसरीका सहायक प्रमुख जिल्ला अधिकारी पोषण लामिछाने सदस्यसचिव रहनेछन् । साथै, सुरक्षा निकाय र ऊर्जा मन्त्रालयका प्रतिनिधिसमेत समितिमा रहने गृह मन्त्रालयका प्रवक्ता तथा सहसचिव आनन्द काफ्लेले जानकारी दिएका छन् ।

आइतबार राति कप्तानगञ्जमा भएको झडपका क्रममा सुरक्षाकर्मीले चलाएको गोली लागेर एक जनाको मृत्यु भएको थियो । मृत्यु हुनेमा कप्तानगञ्ज निवासी ओमप्रकाश मेहता रहेका छन् ।

मन्दिरमा ठूलो आवाजमा डिजे बजाइएको तथा त्यसअघि विद्युत्को पोलमा राखिएको मुस्लिम समुदायको झन्डा हटाएर हिन्दु समुदायको झन्डा राखिएको विषयलाई लिएर विवाद सुरु भएको बताइएको छ । विवाद बढ्दै गएपछि दुई समुदायबीच झडप भएको थियो ।