विराटनगर । सुनसरीको देवानगञ्ज गाउँपालिका–३ स्थित कप्तानगञ्जमा कर्फ्यू जारी रहेकै बेला आगजनी र तोडफोडका घटना हुन थालेपछि नेपाली सेना परिचालन गरिएको छ ।

देवानगञ्जमा भएको घटनालाई लिएर सुनसरीका विभिन्न स्थानमा प्रदर्शन चर्किएपछि नेपाली सेना परिचालन गरिएको हो । सुनसरीका प्रमुख जिल्ला अधिकारी वासुदेव घिमिरेका अनुसार कर्फ्यू लागू भएका क्षेत्रमा सेनाको टोली परिचालन गरिएको छ ।

कर्फ्यूको अवज्ञा गर्दै बिहानैदेखि सडकमा उत्रिएको भिडले टायर बालेर प्रदर्शन गरेपछि अवस्था तनावग्रस्त बनेको हो । नेपाल प्रहरी र सशस्त्र प्रहरीको ठूलो संख्यामा टोली परिचालन गरिए पनि भिड नियन्त्रण गर्न कठिन भएपछि सेना परिचालन गर्नुपरेको प्रमुख जिल्ला अधिकारी घिमिरेले बताए । बख्तरबन्द गाडीसहित हतियारधारी सेनाको टोलीसमेत कप्तानगञ्ज पुगेको छ ।

आइतबार राति दुई समुदायबीच तनाव उत्पन्न भएपछि प्रहरीले गोली चलाएको थियो । घटनामा एक जनाको मृत्यु भएको छ भने प्रहरीसहित २१ जना प्रदर्शनकारी घाइते भएका छन् ।

घटनापछि सुनसरीको लौकही, जिल्ला सदरमुकाम इनरुवा लगायतका क्षेत्रमा प्रदर्शन भइरहेको छ । देवानगञ्ज, हरिनगर र कप्तानगञ्ज क्षेत्रमा कर्फ्यू उल्लंघन गर्दै स्थानीय समूह–समूह बनाएर प्रदर्शनमा उत्रिएका छन् ।

सुरक्षा चुनौती बढेपछि कोशी प्रदेशका विभिन्न जिल्लाबाट नेपाल प्रहरी, सशस्त्र प्रहरी तथा दंगा नियन्त्रणका विशेष टोलीसमेत सुनसरी झिकाइएको छ । कोशी प्रदेश प्रहरी प्रवक्ता एसएसपी योगेन्द्रसिंह थापाका अनुसार कप्तानगञ्जको अवस्था थप संवेदनशील हुन नदिन प्रदेशभरका जिल्लाबाट थप सुरक्षाकर्मी परिचालन गरिएको छ ।