काठमाडौं । बाढीपहिरोका कारण देशका विभिन्न राजमार्ग तथा सडकखण्ड आज पनि अवरुद्ध भएका छन् । केही सडकमा भने एकतर्फी रूपमा यातायात सञ्चालन भइरहेको प्रहरीले जनाएको छ ।

इलाममा मेची राजमार्ग, काभ्रेमा बीपी राजमार्ग, मकवानपुरमा कान्तीलोकपथ, सिन्धुपाल्चोकमा अरनिको राजमार्ग, रसुवामा त्रिशूली–मैलुङ सडक, नुवाकोटमा टोखा–छहरे सडक, लमजुङमा बेँसीसहर–मनाङ सडक र रुकुम पश्चिममा जाजरकोट–डोल्पा सडक पूर्णरूपमा अवरुद्ध छन् ।

मेची राजमार्ग अवरुद्ध भए पनि इलाममा वैकल्पिक सडकमार्फत यातायात सञ्चालन भइरहेको छ । काभ्रेमा बीपी राजमार्ग रातको समयमा बन्द रहे पनि दिनको समयमा सवारीसाधन सञ्चालन भइरहेको प्रहरीले जनाएको छ ।

त्यसैगरी बागलुङको कालीगण्डकी करिडोर, मुस्ताङको बेनी–जोमसोम र जोमसोम–कोरला सडकखण्डमा एकतर्फी रूपमा मात्रै सवारीसाधन सञ्चालन भइरहेका छन् ।

बाढीपहिरोका कारण सडक अवरुद्ध भएपछि यात्रु तथा सवारीसाधनलाई वैकल्पिक मार्ग प्रयोग गर्न र यात्रा गर्दा आवश्यक सतर्कता अपनाउन प्रहरीले आग्रह गरेको छ ।