गोविन्द शर्मा

बाँके । बाँकेको खजुरा गाउँपालिका –४ एफगाउँका खेमबहादुर विक ११ वर्षका भए । गाउँघरमा हुने विवाह पूजा, धार्मिक कार्यक्रम र अन्य कार्यक्रममा उनि आफ्ना हजुरबुवा तिलबहादुरसँगै बाजा बजाउन जान्छन ।

एफगाउँस्थित जनकल्याण माविमा कक्षा ६ मा अध्ययनरत खेम विद्यालय बन्द भएको दिनमा गाउँघरमा हुने विभिन्न कार्यक्रममा बाजा बजाउने गर्छन । यसैगरी एफगाउँकै धनसिंह परियार वर्षौदेखि बाजा दमाहा बजाउँदै आएका  छन ।

पछिल्लो केही वर्षदेखि उनका नाति सुनिल परियार पनि उनको साथमा देखिन्छन । जनकल्याण माविमै कक्षा ७ मा अध्ययनरत सुनिल विद्यालय बिदा भएको दिनमा हजुरबुवाको साथमा बाजा बजाउँदै कार्यक्रममा सहभागी हुने गरेको बताउछन ।

हजुरबुवाहरुले बाजा बजाउँदा रमाइलो लागेर आफू पनि विद्यालय बन्द भएको दिनमा सँगै हिंड्ने गरेको उनको भनाइ छ । सुनिल भन्छन,  ‘सुरुमा रमाइलोका लागि बाजा बजाउन थालेका थियौं, अहिले विद्यालय नभएको दिनमा अभिभावकले खोजेर ल्याउनुहुन्छ ।’

नाति पुस्तालाई दमाहा र अन्य बाजा बजाउन सिकाइरहेका ज्येष्ठ नागरिक बाजाको पुस्तान्तरणका लागि योगदान गर्न सकेकोमा उत्साहित छन । 

खजुरा गाउँपालिकाका अध्यक्ष डम्बरबहादुर विकले गाउँपालिकाले , संस्कृतिको संरक्षणका लागि वार्षिक बजेट विनियोजन गरिरहेको बताउछन । खजुरा गाउँपालिकाको ‘ई’ गाउँ, धौलागिरी, सीतापुरलगायतका स्थानमा ज्येष्ठ नागरिकले परम्परागत संस्कृतिलाई नयाँ पुस्तामाझ सिकाइरहेको उनि बताउछन ।

स्रोत :  गोरखापत्र अनलाइन