पनौतीको शान्त पर्वत–काखमा अवस्थित विश्वकै अद्वितीय कालाग्नि रुद्रपीठ लड्केश्वर धाम आज पुनः एक ऐतिहासिक साक्षी बन्यो । पहाडको शीतल हावा र मन्दिरको घण्टीसँगै गुञ्जिएको मन्त्रध्वनि बीच, संस्कृति, पर्यटन तथा नागरिक उड्डयन मन्त्री माननीय बद्री पाण्डे र सन्त समाजका तर्फबाट श्री १००८ स्वामी रमणानन्द जी महाराजले संयुक्त करकमलबाट ‘राष्ट्रको गौरव’ शिव त्रिशूलको निशानी अनावरण गरे ।

६.५ किलो शुद्ध चाँदीको निर्मल चमकमा झल्किएको यो निशानी केवल धातुको टुक्रा मात्र होइन - यो राष्ट्रको आत्मा, श्रद्धा र संकल्पको मूर्त प्रतीक हो । एक वर्ष अगाडि ७७ जिल्लाको रथयात्रा र भव्य कोटिहोम सम्पन्न गरी राष्ट्रिय धर्म सभाद्वारा पीठाधीश घोषणा भइसकेको यस पीठमा, आजको यो अनावरणले भोलिको इतिहासलाई अझ गौरवमय बनाएको छ ।

मन्त्री पाण्डेले पशुपतिनाथका दर्शन गर्ने भक्तजनलाई अब लड्केश्वर धाममा रहेको शिवको पाशुपतास्त्र पनि दर्शन गर्ने अवसर सहज बनाइने प्रतिवद्धता व्यक्त गर्दै, यस पवित्र पीठलाई राष्ट्रिय धार्मिक–पर्यटकीय गन्तव्यको सूचीमा सूचीकृत गर्ने घोषणा गरे । उनको शब्दमा राष्ट्रको भविष्यको उज्यालो झल्किँदै थियो ।

समारोहमा उपस्थित श्री १००८ स्वामी रमणानन्द महाराजको स्वर गम्भीर र मर्मस्पर्शी थियो "अतीतमा राजा, नेता वा जनता जोसुकैले गल्ती गरे पनि, अब सबैले शिव भगवानसँग क्षमा मागेर देशलाई समृद्धिको बाटोमा डोर्याउनुपर्छ ।"

पीठाधीश श्री मुकुन्द शर्मा हुमागाईंको संकल्प अझ गहिरो छ (‘राष्ट्र र राष्ट्रियता प्रति श्रद्धा एवं संकल्प यात्रा’ अन्तर्गत यो निशानी हरेक जिल्लामा पुर्याइनेछ, ताकि लड्केश्वर दर्शन गर्न नपाएका भक्तजनले पनि प्रत्यक्ष दर्शनको सरह अनुभव गर्न सकून् । यात्राको सुरक्षा सुनिश्चित गर्न गृह मन्त्रालयले ७७ वटै जिल्लाका प्रशासन कार्यालयलाई पत्र पठाइसकेको छ, र पीठको गौरव बोकेको विशेष रथ पनि यात्राका लागि तयार भइसकेको छ ।

आज लड्केश्वर धामको आकाशमा जुन घण्टीको ध्वनि गुन्जियो, त्यो केवल एक दिनको सम्झना मात्र होइन ( यो राष्ट्रको आत्मसम्मान, श्रद्धा र विश्वासको स्थायी प्रतिध्वनि हो, जुन पुस्तौंपुस्ता गुन्जिरहनेछ ।