काठमाडौं । प्रमुख प्रतिपक्षी दल नेपाली कांग्रेसको सुदुरपश्चिम प्रदेश भेला आज धनगढीमा हुँदैछ । सुदूरपश्चिम प्रदेशमा ‘प्रदेश र स्थानीय तह केन्द्रित प्रदेशस्तरीय भेला’को आयोजना गरेको हो । 

नीति अनुसन्धान तथा प्रशिक्षण प्रतिष्ठानद्वारा आयोजना हुने भेलाका लागि पार्टी सभापति गगनकुमार थापा कार्यक्रमस्थलमा जाने भएका छन् । भेलामा सहभागी हुन उपसभापति विश्वप्रकाश शर्मा र महामन्त्री गुरुराज घिमिरे भने शुक्रबार नै धनगढी पुगिसकेका छन् । 

विशेष महाधिवेशनपछि कांग्रेसले निवर्तमान सभापति शेरबहादुर देउवाको गृहप्रदेशबाट वर्तमान सभापति गगनकुमार थापाको प्रमुख आतिथ्यतामा स्थानीय तह र प्रदेशका सांसद तथा मन्त्रीहरूसँग सामूहिक छलफल गर्ने तयारी गरेको हो ।

हिजो पत्रकार सम्मेलनमार्फत् सहमहामन्त्री प्रकाश रसाइली स्नेहीले प्रदेशस्तरीय प्रशिक्षण भेलाको सम्पूर्ण तयारी पूरा भइसकेको जानकारी दिएका थिए ।

भेलाका लागि कार्यवाहक मुख्य सचिव कृष्णप्रसाद दुलालले प्रदेश सभापति र नौवटै जिल्लाका सभापतिलाई सहभागी हुन पत्र पठाएका थिए । पत्रमा सुदूरपश्चिम प्रदेश समितिका तथा कार्यसम्पादन समितिका पदाधिकारी र सदस्यहरू, प्रदेश सरकारका प्रतिनिधि तथा प्रदेश सभामा रहेका सांसदहरू, सबै जिल्ला सभापति, जिल्ला समन्वय समितिका प्रमुख तथा उपप्रमुखहरू, स्थानीय तहका प्रमुख तथा उपप्रमुखहरू, पालिकामा विजयी भएका पार्टी सभापतिहरू, कैलाली जिल्लाका सबै पदाधिकारी, प्रतिनिधि सभा, क्षेत्रीय, प्रदेश तथा पालिका सभापतिहरूलाई आमन्त्रण गरिएको छ ।