काठमाडौं । टर्कीको इस्तानबुलबाट आएको टर्किस एयरलाइन्सको जहाज त्रिभुवन अन्तर्राष्ट्रिय विमानस्थलमा अवतरण गर्ने क्रममा पांग्रामा आगो लागेको छ । विमानमा आगो लागेपछि त्रिभुवन अन्तर्राष्ट्रिय विमानस्थल बन्द गरिएको छ ।

जहाज ल्यान्ड गर्ने क्रममा पांग्रामा आगो देखिएको थियो । दमकलको प्रयोग गरेर आगो निभाइएको छ । टीके ७२६ नम्बरको टर्किस एयरलाइन्सको विमान अवतरण गर्ने क्रममा आगो लागेको हो । 

बिहान ६:३५ मा विमानस्थलमा ल्यान्ड भएको जहाजमा २७७ जना यात्रु थिए । विमानमा रहेका सबै यात्रुहरु सुरक्षित रहेको बताइएको छ । 

नागरिक उड्डयन प्राधिकरणका सूचना अधिकारी ज्ञानेन्द्र भुलले दिएको जानकारी अनुसार जहाज ल्यान्डिङको क्रममा पछाडिको ल्यान्डिङ गियरमा आगोको झिल्का देखिएको थियो ।

आगो देखिनासाथ जहाज तत्काल रोकिएको र तत्काल दमकल प्रयोग गरेर आगो नियन्त्रणमा ल्याउने प्रयास गरिएको थियो ।