काठमाडौं । सत्तारुढ राष्ट्रिय स्वतन्त्र पार्टी (रास्वपा)को प्रदेशस्तरीय अधिवेशन आजदेखि सुरु हन लागेको छ । धेरै जसो जिल्लाहरुको अधिवेशन सकेको रास्वपाले आजदेखि असार १ गतेसम्म प्रदेशस्तरीय अधिवेशन गर्न लागेको हो । 

देशको संघीय राजधानी रहेको वागमती प्रदेशको अधिवेशन आज पार्टी सभापति रवि लामिछानेले उद्य्घाटन गर्न लागेका छन् । काठमाडौंमा हुन लागेको उद्घाटनमा लामिछाने प्रमुख अतिथिका रुपमा उपस्थित भएर सम्बोधन समेत गर्न लागेका हुन् । 

पार्टी स्थापना भएपछि पहिलो पटक आन्तरिक निर्वाचनमा होमिएको रास्वपाले जेठ २३ र २४ गते जिल्लाहरुको अधिवेशन गरेर नेतृत्व चयन गरेको छ । केही जिल्लाहरुमा शान्त निर्वाचन भए पनि केही जिल्लाहरुमा भने हात हालाहालकै अवस्था आएको थियो । प्रथम महाधिवेशन भने असार ७ गते पार्टी स्थापना दिवसको अवसर पारेर चितवनमा हुने भएको छ ।