काठमाडौं । परराष्ट्रमन्त्री शिशिर खनालले प्रधानमन्त्री बालेन्द्र शाहको विवादित अभिव्यक्तिबारे संसदमा स्पष्टीकरण दिएका छन् । उनले प्रधानमन्त्रीको भनाइ नेपाल–भारत सीमाक्षेत्रमा देखिएका अतिक्रमण तथा सीमा व्यवस्थापनसँग सम्बन्धित रहेको बताएका छन् ।

प्रतिनिधिसभाको बुधबारको बैठकमा सभामुखसँग विशेष समय लिएर बोल्दै मन्त्री खनालले प्रधानमन्त्रीले उल्लेख गरेको विषयलाई गलत ढंगले बुझिएको जिकिर गरे । प्रधानमन्त्रीले नेपाल र भारतका सीमावर्ती क्षेत्रमा देखिएका व्यवहारिक समस्या तथा दशगजा क्षेत्रको अवस्थातर्फ संकेत गरेको उनको भनाइ थियो ।

मन्त्री खनालका अनुसार सीमावर्ती क्षेत्रका कतिपय स्थानमा एक देशका नागरिकले अर्को देशको भूभागमा खेतीपाती गर्ने, घर बनाउने तथा अन्य गतिविधि सञ्चालन गर्ने अवस्था देखिएको छ । प्रधानमन्त्रीको अभिव्यक्ति पनि यिनै यथार्थ घटनासँग जोडिएको उनले स्पष्ट पारे ।

उनले नेपाल–भारत सीमा व्यवस्थापनका लागि दुवै देशका सम्बन्धित संयन्त्रहरू सक्रिय रहेको जानकारी दिँदै सीमांकन, नक्सांकन तथा तथ्यगत अध्ययनका कामहरू निरन्तर भइरहेको बताए ।

परराष्ट्रमन्त्रीले विभिन्न अध्ययन तथा प्राविधिक प्रतिवेदनहरूले कतिपय स्थानमा नेपालको उपयोगमा रहेको भूमि भारततर्फ र भारतको उपयोगमा रहेको भूमि नेपालतर्फ परेको अवस्था देखाएको उल्लेख गरे । यस्ता विषयहरूलाई कूटनीतिक र प्राविधिक माध्यमबाट समाधान गर्ने प्रयास भइरहेको उनको भनाइ थियो ।

प्रधानमन्त्रीको अभिव्यक्तिलाई लिएर विपक्षी दलहरूले उठाएको प्रश्नपछि संसदमा देखिएको गतिरोध अन्त्य गर्ने उद्देश्यले सरकारले यो स्पष्टीकरण दिएको हो ।