बुटवल । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले सरकारको पहिलो १०० दिन उपलब्धिविहीन र पूर्णतः असफल भएको टिप्पणी गरेका छन् । लुम्बिनी प्रदेशस्तरीय पार्टी कार्यक्रममा सहभागी हुन बुटवल पुगेका प्रचण्डले सञ्चारकर्मीसँग कुरा गर्दै जनतालाई अनेक आश्वासन र अपेक्षा देखाएर बनेको सरकारले सय दिनमा कुनै उल्लेखनीय उपलब्धि हासिल गर्न नसकेको दाबी गरे ।

वाम एकताबारे अहिले कुनै औपचारिक छलफल नभएको स्पष्ट पार्दै उनले तत्कालको प्राथमिकता सबै राजनीतिक दलसँग आवश्यक विषयमा सहकार्य र समन्वय गर्नु रहेको बताए । उनका अनुसार अहिले एकताको भन्दा पनि सहकार्यको वातावरण बनाउन जोड दिइएको छ ।

प्रदेशस्तरीय कार्यक्रममा सहभागी हुन प्रचण्डसँगै नेकपाका सहसंयोजक माधवकुमार नेपाल, वरिष्ठ नेता नारायणकाजी श्रेष्ठ, वर्षमान पुन र बलदेव खनाललगायत शीर्ष नेताहरू पनि बुटवल पुगेका छन् ।