काठमाडौं । नेपाली कांग्रेसको इतर पक्षले साउन ६ गते बीपी स्मृति दिवसको अवसरमा काठमाडौंमा बृहत् कार्यक्रम आयोजना गर्ने निर्णय गरेको छ ।

चुनदेवीस्थित सम्पर्क कार्यालयमा बसेको बैठकपछि नेता मीन विश्वकर्माले कार्यक्रम सम्पर्क कार्यालयबाट सञ्चालन हुने जानकारी दिए । कार्यक्रमको स्थान र विस्तृत कार्यतालिका भने आगामी बैठकले तय गर्ने उनले बताए ।

विश्वकर्माका अनुसार भोलि बस्ने बैठकले १५औँ महाधिवेशनको तयारी, कार्यतालिका तथा सम्पर्क कार्यालयबाट सञ्चालन हुने आगामी गतिविधिबारे पनि निर्णय गर्नेछ ।

उनले सम्पर्क कार्यालयको मुख्य उद्देश्य पार्टीभित्र एकता कायम गर्नु रहेको उल्लेख गर्दै एकताको प्रयास सफल नभए वैकल्पिक विकल्पबारे पनि छलफल भइरहेको बताए। 

‘हामी पहिलो प्राथमिकतामा पार्टी एकतालाई राखेका छौँ । यदि त्यो सम्भव भएन भने अन्य विकल्पबारे पनि छलफल भइरहेको छ । यसको निष्कर्ष भोलिको बैठकले निकाल्नेछ,’ उनले भने ।

विश्वकर्माले विशेष महाधिवेशनमा सहभागी नभएका धेरै नेता–कार्यकर्ता अझै पार्टीको मूलधारबाहिर रहेको उल्लेख गर्दै उनीहरूलाई समेटेर १५औँ महाधिवेशनलाई एकताको महाधिवेशन बनाउनुपर्नेमा जोड दिए ।

उनले निर्वाचन आयोग र अदालतबाट वैधानिकता प्राप्त कार्यसमितिलाई आफूहरूले पनि स्वीकार गरेको स्पष्ट पार्दै, त्यस संरचनाभित्र छुटेका सबै पक्षलाई समेटेर अघि बढ्नुपर्ने धारणा राखे ।

उनका अनुसार १५औँ महाधिवेशनलाई एकतामुखी बनाउन दबाब सिर्जना गर्ने उद्देश्यले सम्पर्क कार्यालय स्थापना गरिएको हो । पार्टी अहिले एकताको दिशाभन्दा विभाजनतर्फ उन्मुख देखिएकाले त्यसलाई रोक्न पहल आवश्यक रहेको उनको भनाइ छ ।