काठमाडौं । संघीय संसदअन्तर्गत रहेका चारवटा संसदीय समितिको बैठक आज बस्दैछ । संसदीय सुनुवाइ समिति, कानून, न्याय तथा मानवअधिकार समिति, कृषि तथा प्राकृतिक स्रोत समिति तथा महिला तथा सामाजिक मामिला समितिले विभिन्न समसामयिक विषयमा छलफल गर्ने कार्यसूची तय गरेका छन् ।

संसदीय सुनुवाइ समितिको बैठक बिहान ९ः३० बजे सिंहदरबारस्थित राज्य व्यवस्था तथा सुशासन समितिको सभाकक्षमा बस्नेछ । बैठकमा प्रमुख निर्वाचन आयुक्त र निर्वाचन आयुक्त पदका लागि सिफारिस भएका व्यक्तिहरूमाथि संसदीय सुनुवाइ प्रक्रिया अघि बढाइनेछ ।

संवैधानिक परिषद्ले प्रमुख निर्वाचन आयुक्तमा मोरङका मानबहादुर कार्की तथा निर्वाचन आयुक्तमा काठमाडौंका डा. राजीव सुब्बा र ओखलढुंगाका गुरु वाग्लेलाई नियुक्तिका लागि सिफारिस गरेको छ ।

यसअघि प्रमुख निर्वाचन आयुक्त दिनेशकुमार थपलियाको कार्यकाल समाप्त भएपछि आयोग प्रमुखविहीन बनेको थियो । हाल आयोगको नेतृत्व कार्यवाहक प्रमुख निर्वाचन आयुक्त रामप्रसाद भण्डारीले सम्हालिरहेका छन् ।

यता, कृषि तथा प्राकृतिक स्रोत समितिको बैठक बिहान ८ बजे बस्नेछ । बैठकमा नेपाल कृषि अनुसन्धान परिषद् (नार्क) तथा राष्ट्रिय कृषि आधुनिकीकरण कार्यक्रमअन्तर्गत सञ्चालन भएका अनुसन्धान केन्द्र र कार्यक्रमहरूको संसदीय अनुगमन प्रतिवेदन तथा स्थलगत अवलोकनको समीक्षा गरिने कार्यसूची छ ।

कानून, न्याय तथा मानवअधिकार समितिको बैठक बिहान ८ः३० बजे बस्नेछ। बैठकमा बाल सुधार गृहमा रहेका बालबालिकाको मानवअधिकार अवस्थासम्बन्धी उपसमितिको प्रतिवेदनमाथि छलफल गरिनेछ । साथै, विभिन्न कारागार र हिरासतमा रहेका थुनुवा तथा कैदीबन्दीको मानवअधिकार अवस्थाबारे अध्ययन गरिरहेको उपसमितिको कार्यावधि थप गर्ने विषयमा पनि निर्णय हुने अपेक्षा गरिएको छ ।

त्यसैगरी, महिला तथा सामाजिक मामिला समितिको बैठक बिहान ९ बजे बस्नेछ । बैठकमा समितिको कार्यविधि तथा सञ्चालनसम्बन्धी विषयमा विस्तृत छलफल गर्ने कार्यसूची रहेको छ ।