काठमाडौं । नेपाल कम्युनिस्ट पार्टीका सांसद रमेश मल्लले सञ्चारमाध्यम र सार्वजनिक स्थानमा गाडी तेर्स्याएर अवरोध सिर्जना गर्नेहरूमाथि कडा कानुनी कारबाही गर्न सरकारसँग माग गरेका छन् ।

मंगलबार प्रतिनिधिसभा बैठकमा बोल्दै मल्लले मुगुका २५ वर्षीय गणेश नेपालीको आत्मदाह प्रयासपछि भएको मृत्युको घटनालाई अन्यत्र मोड्ने उद्देश्यले केही राज्यसंरक्षित व्यक्तिहरूले योजनाबद्ध रूपमा गतिविधि गरेको आरोप लगाए ।

उनले राजधानीमा पछिल्ला दिनमा भएका घटनाले गम्भीर प्रश्न उठाएको भन्दै आइतबार न्युरोड क्षेत्रमा जानाजानी सवारी अवरोध गरेर सर्वसाधारणलाई सास्ती दिइएको दाबी गरे ।

सांसद मल्लका अनुसार सोमबार केही सञ्चारमाध्यमका कार्यालय तथा नेपाली कांग्रेसका सभापति गगन थापाको निवासअगाडि समेत गाडी तेर्स्याएर दबाब सिर्जना गर्ने प्रयास भएको थियो ।

यस्ता गतिविधिमा संलग्न व्यक्तिहरूलाई सामान्य जरिबाना गरेर छाड्नु पर्याप्त नहुने उनको भनाइ छ । उनले दोषीको पहिचान गरी सवारीसाधन जफत गर्न, विस्तृत छानबिन गर्न र कानुनअनुसार कडा कारबाही अघि बढाउन सरकारसँग आग्रह गरे ।