काठमाडौं . विशेष अदालतले सम्पत्ति शुद्धीकरणसम्बन्धी मुद्दामा प्रतिवादी रहेका नेकपा एमालेका उपाध्यक्ष तथा पूर्वअर्थमन्त्री विष्णु पौडेललाई साधारण तारेखमा रिहा गर्ने आदेश दिएको छ ।

शुक्रबार भएको थुनछेक बहसपछि न्यायाधीश नारायणप्रसाद पौडेल, डिल्लीरत्न श्रेष्ठ र विदुर कोइरालाको इजलासले उनलाई हिरासतमा नराखी नियमित तारेखमा उपस्थित हुने सर्तसहित रिहा गर्ने आदेश जारी गरेको हो ।

यसअघि सम्पत्ति शुद्धीकरण विभागले व्यवसायी दीपक भट्टलगायतसँग सम्बन्धित गैरकानुनी सम्पत्ति लुकाउन तथा त्यसका लागि सहयोगी भूमिका खेलेको आरोप लगाउँदै पौडेलसहित ६ जना व्यक्ति र १० कम्पनीविरुद्ध विशेष अदालतमा मुद्दा दायर गरेको थियो ।

विभागले पौडेलबाट २० करोड ९० लाख रुपैयाँ बिगो असुल गर्न तथा उनको बैंक खातामा रहेको ६ लाख ३४ हजार ५४५ रुपैयाँ जफत गर्न मागदाबी गरेको छ ।

उक्त मुद्दाको थप कानुनी प्रक्रिया विशेष अदालतमा जारी रहनेछ ।