काठमाडौं । राष्ट्रपति रामचन्द्र पौडेलसँग राष्ट्रिय स्वतन्त्र पार्टी (रास्वपा) का सभापति रवि लामिछानेले भेटवार्ता गरेका छन् । बुधबार बिहान राष्ट्रपति भवन शीतल निवास पुगेर लामिछानेले राष्ट्रपति पौडेलसँग भेटवार्ता गरेका हुन् ।

राष्ट्रपति पौडेलसँगको भेटमा सभापति लामिछानेले सुनसरीमा भएको घटनाका विषयमा सर्वदलीय बैठकमा भएको छलफलबारे जानकारी गराएको राष्ट्रपति सचिवालयले जनाएको छ । सर्वदलीय बैठक सम्पन्न भएलगत्तै लामिछाने राष्ट्रपति भवन पुगेका थिए ।

भेटका क्रममा लामिछानेले समसामयिक विषय तथा पछिल्लो राजनीतिक अवस्थाबारे समेत राष्ट्रपति पौडेललाई जानकारी गराएको बताइएको छ ।