काठमाडौं । गत भदौ १० गते रसुवामा आएको विनाशकारी बाढीबाट भएको मानवीय तथा भौतिक क्षतिप्रति रुवान्डामा रहेका नेपालीहरूले दुःख व्यक्त गरेका छन् ।

बाढीमा नेपालीसहित विभिन्न देशका नागरिकले ज्यान गुमाउनुका साथै ठूलो भौतिक क्षति व्यहोर्नुपरेको घटनाप्रति दुःख व्यक्त गर्दै रुवान्डामा रहेका नेपालीहरूले पीडित परिवार तथा मातृभूमिप्रति ऐक्यबद्धता जनाएका हुन् ।

दिवंगतप्रति श्रद्धाञ्जली तथा शोकसन्तप्त परिवारजनप्रति समवेदना व्यक्त गर्दै उनीहरूले मृतकहरूको आत्माको चिरशान्तिको कामना गरेका छन् । सोही अवसरमा दिवंगतहरूको सम्झनामा दीप प्रज्वलन कार्यक्रमसमेत आयोजना गरिएको छ ।

कार्यक्रममा अझै सम्पर्कविहीन तथा बाढीका कारण फसिरहेका व्यक्तिहरूको शीघ्र र सकुशल उद्धारको कामना गरिएको छ । साथै, उद्धार तथा राहत कार्यमा खटिएका सुरक्षाकर्मी, स्वास्थ्यकर्मी, स्वयंसेवक तथा सम्बन्धित निकायहरूको प्रयास सफल होस् भन्ने शुभेच्छा व्यक्त गरिएको छ ।

रुवान्डामा रहेका नेपालीहरूले विपद्को यस दुःखद घडीमा आफूहरू मातृभूमि र बाढीपीडित परिवारहरूको साथमा रहेको बताएका छन् ।