गाउँ पर्यटन प्रबर्धन मञ्च (भिटोफ) नेपाल र सिद्धलेक गाउँ पालिका धादिङले धान दिवसको अवसर पारेर बुङचुङमा रोपाई महोत्सव मनाएका छन् ।

हिजो असार १५ को अवसर पारेर सिद्धलेक गाउँपालिका पुगेका भिटोफका प्रतिनिधि तथा पर्यटन व्यवसायीले रोपाई महोत्सव मनाएका हुन् । 

रोपाई महोत्सवको अवसरमा आयोजित कार्यक्रममा भिटोफ नेपालकी अध्यक्ष शकुन्तला देवकोटाले कृषि र पर्यटनलाई जोड्न सके नेपालको अर्थतन्त्रमा टेवा पुग्ने बताइन् । उनले भनिन्, ‘पर्यटकहरू गाउँ गाउँ आउँदा यहाँका फलफूल, तरकारी तथा अन्नले राम्रो बजार पाउँछन् । साथै पर्यटकले अर्गानिक खानेकुराको स्वाद लिन सक्छन् ।’

सिद्धलेक गाउँपालिकाका अध्यक्ष परशुराम खतिवडाले गाउँ पर्यटन प्रबर्धन मञ्च (भिटोफ) सँगको संयुक्त आयोजनामा रोपाई महोत्सव मनाउन पाएकोमा खुसी व्यक्त गरे । उनले भने, ‘काठमाडौँबाट नजिकै रहेको बुङचुङमा कृषि पर्यटनको प्रशस्तै सम्भावना रहेको छ । कृषि र पर्यटनलाई जोड्न सके भारतीय उत्पादनको दबदबा रहेको कृषिउपजको बजारमा धादिङको अर्गानिक उत्पादनको प्रबर्धन गर्न सकिन्छ ।’