काठमाडौं । समस्याग्रस्त सहकारी व्यवस्थापन समितिको कार्यालयले समस्याग्रस्त घोषित हाम्रो नयाँ कृषि सहकारी संस्था लिमिटेड र कृषि विकास बहुउद्देश्यीय सहकारी संस्था लिमिटेडका १३२ जना ऋणीहरूको नामावली सार्वजनिक गरेको छ ।

समितिका अनुसार सार्वजनिक नामावलीमा हाम्रो नयाँ कृषि सहकारीका १२ जना र कृषि विकास बहुउद्देश्यीय सहकारीका १२० जना ऋणी समावेश छन् । समितिले २३ वैशाख २०८३ मा भएको निर्णयअनुसार उपलब्ध ऋण विवरणका आधारमा नामावली सार्वजनिक गरिएको जनाएको छ ।

समितिले यसअघि नै ऋण चुक्ता गरिसकेका भए पनि नामावलीमा नाम परेको व्यक्तिलाई सम्बन्धित प्रमाणसहित कार्यालयमा उपस्थित हुन आग्रह गरेको छ ।

यस्तै, ऋण तिर्न बाँकी रहेका ऋणीहरूलाई तत्काल समितिको कार्यालयमा सम्पर्क गरी बक्यौता रकम चुक्ता गर्न सूचित गरिएको छ । अन्यथा प्रचलित कानुनबमोजिम असुली प्रक्रिया अघि बढाइने चेतावनी समितिले दिएको छ ।

बचतकर्ताको रकम फिर्ता गराउने तथा उनीहरूको हित संरक्षण गर्ने उद्देश्यले ऋणीहरूको विवरण सार्वजनिक गरिएको समितिले स्पष्ट पारेको छ ।